[dr.cuty]

بسم الله الرحمن الرحيم

السلام عليكم ورحمه الله وبركاته

والصلوات والسلام على أشرف المرسلين

بدايه حبيت أشكر كل من اداره الهدف الرياضي ومشرفينهم ومشرفاتهم

واعضائهم على حسن استضافتهم لي واعتباري وحده منهم بفتره وجيزة

وحبيت اني اميز هالمنتدى اللي صار اساسي بحياتي

بتجربه من حياتي

هي تجربه مريرة ورائعه بنفس الوقت

حبيت اكتب لكم قصتي عن اصعب تجربه مريت بها واحلاها بالنسبه لي

راح اكتب لكم ياها اجزاء وان شالله تنال على اعجابكم واتمنى اني الاقي ردود طيبه منكم وتحفزني للأمام

اتوقع بعض اعضاء الهدف يعرف اني مبتورة الرجلين جرااء خطا طبي .... بس محد يعرف كيف

صار.... اليوم بقولكم تجربتي كيف بدت

واتمنى انها تلاقي استحسانكم والقصه هاي واقعيه مريت فيها بكل لحظه من حياتي اكتبها لكم للعظه

والعبره

واسأل الله العظيم ان يشفيني وان يشفي كل مريـــــــض

الجزء الأول

اسمي (..) عائلتي مكون من 12 فرد نصهم شباب ونصهم بنات ما شالله عليناا

انا طبعا اخر العنقوود يعني ماخذه الدلع كله مثل ما يقولون

يتيمه الأب .. الله يرحمك يا ابويه ويغفر لك ويغفر لكل جميع المسلمين

ادرس طب اخر سنه بالامارات

حياتي كانت حلوة طبعاا قبل والحين ولله الحمد

كنت طالبه شيطوونه وايد ولساني طويل ولي مغامراتي وذكرياتي الحلوة

اتمنيت ادرس طب من وانا صغيره والوالد الله يرحمه كان يشجعني على هالشي لانه كان ممرض الله

يرحمه وان وصغيره اموت بالعاب الدكاتره والسماعات

وكنت ياسلاام اموت بالكوت الابيض وحلمي اني البسه

تخرجت من الثانويه بنسبه 95 وكنت مسجله بجامعه العين عشان ادخل طب بس للأسف ماوافقوا

وحطوني هندسه وكنت زعلانه وحالتي حاله

والحمدلله يت من الله وحصلت منحه من ديوان الشيخ زايد الله يرحمه على امريكا

وطبعااا اهلي رفضوا كيف بنتهم الصغيره تسافر برع روحها ومايستوي

ممنوع

وطبعا سمعت شورهم والحمدلله الله يسر لي وتحقق حلمي بالانضمام لكليه خاصه فدبي

انا طبعاا استانست وفرحت ومب مصدقه اني خلاص بدرس طب .... اخيرا حلمي بيتحقق

ويوم رحت الكليه اقدم اوراقي انصدمت من الكليه بصراحه

مايليق عليها اسم كليه بالاصح بس الواحد يقول الحمدلله عالاقل ندرس طب ونحقق حلمنا

ودخلت الكليه وكان تحدي بالنسبه لي اني اثبت ذاتي البدايه كانت صعبه لغه يديده علي ولاتيني

وخربطان ولازم ندرس جسم الانسان كامل واسمااء العظام والعضله من وين تطلع ومن وين تدخل

!!!

الدراسه صدق يبالها مجهود والحمدلله تكللت اول سنتين بالنجاح وعديناهم على خير

لان نحن عندنا اول سنتين دوام بالكليه وكليتنا خاصه بالبنات واذكر مريت بموقف مضحك شوي اول

مادخلت الكليه كنا وحليلنا بنات مدارس وعندنا كله مدرسات ماعندنا رياييل المهم كان عندنا دكتور الله

يذكره بالخير يدرسنا ماده الفسيولوجي كان هالدكتور ماشالله عليه فظيع فالشرح اذكر اول ايامنا كنا

نغلط ونزقره استاذ ونقول عن المحاضره حصه بعدنا ما استوعبنا نحن بكليه لوول

المهم طفح الكيل في الدكتور مرة ناديته استاذ جان يعصب علي ويقولي اونه بالمصري هنه مافيش

استاز في دكتور مافيش حصه في محاضرة

اقولكم تيبست بمكاني انا ماسويت شي وحليلي كنت بس بتفلسف واستوي طالبه مجتهده واسأل .....الله

يذكرك بالخير دكتور ي العزيز انزين ..

وباقي السنوات نكون بالمستشفيات ندور علهيم على حسب تقسيم الجروب

المهم تخلصنا من سنه ثانيه بعد كفاح ومعاناه بصراحه

وانتظرنا سنه ثالثه على نار

لانه خلاص هني الواحد يثبت نفسه فالمجال الميداني يعني حياه ثانيه غير

ماشي روتين ماشي محاضرات وتهزيأ من الدكاتره بالكليه وبديناا سنه ثالثه بحماسانا وقروبي العزيز

المؤلف من 6 بنات كلنا مواطنات الا وحده من غزة وحليلها كانت منبوذه لانها دحيحه محد رضى ياخذها الا نحن ..

وبدينا اول دورة بالجراحه

كان شي عجيب بصراحه والدوام حلوو

كنت يوميا انش الصبح من وقت على الساعه5 نصلي الصبح ولازم اخذ شاور محترم عشان اصحصح

عدل واتلبس لبس زووين وشويه خرابيط عالويه عشان المرضى مساكين ماتلوع جبودهم من ويوهنا على الاقل يشوفون ويه سمووح

وكنت امر على ربيعتي بعدها مسكينه ماخذت الليسن

وطبعا اذا دوامنا فدبي

لازم نمر الممزر ناخذ لنا جاي كرك ع الطاير مع خبز براته وطبعا ناخذ حق باقي الشله وبالاصح دلتنا

ا ويانا نترسها من راعي البوارح عشان المحاضرات لوول وكل وحده وطلبيتها من البراته اللي مع دبل

تشيز ودقوس واللي مع شكر هاي تاكله مع شكر والله ماعرف

المهم نوصل طبعا من وقت وناخذ اول باركن واذا حد خذ باركني احط عليه حط بالاصح اسبه اونه اللي يقول مكتوب عالباركن اسمي لوول

ونبدا يومنا الدراسي ندور عالدكتور المسؤول عناا ونحشره بليباات عشان ياخذنا لان وقتنا محدود من

8 لين 12 وعقبمن 1 لين 4 محاضرات وعلى حسب المكان

ويمر اليوم بسرعه اذا كان بزي وتمر ايام ممله لان الدكتور يكون شارد مناا ونتم نقضي نحن يومنا بالممرات لوول

واذا داومي بمستشفى راشد نمر شيشه اينوك ويقتصر ريوقنا على كوب كابتشينو وكراوسون وماي

ولبان طبعا والقهر بمستشفى راشد السيكيورتي اللي يقفل صوب الباركنات اذا وصلنا قبل 7 ونص اونه

حق المرضى الاوليه مشكله المصاروة بعد

المهم ايامنا كانت حلوة فراشد اكثر من دبي بس من يوم فتحوا الكافيه فدبي حبيته اكثر

وايد مواقف عجيبه قابلتني خلال فتره التدريب واحلى شي يوم نشل دله الكرك ونقعد باخر الكلاس مال

المحاضرات ونشفط بالكرك وعقب الدكتور يزخناا ونعطيه كوب عشان يسكت والله ايام

واحلى شي شلتي الله لا يحرمني منهم كنا وايد شياطين بس بحدود نحب الشردات خصه لما تكون علينا محاضره ممله

ويكون مكان المحاضره براشد على طول نتصل سينما جراند ونشوف شو من افلام وشرده نشوف الفيلم

وكنا نشرد ربيعاتنا مال السكن

وطبعا عباياتنا جاهزات بالسياره عشان ما ننفضح خخخخ

المهم خلصنا جراحه وبدي

نا طب باطني والحمدلله اموري كلها طيبه...

ومرة وحده ماعرف شو صار في حالتي تغيرت تعبت مرة وحده كله طايحه وزجام وبلاعيم

وماقدرت اداوم والحراره عندي عاليه وماتنزل رحت العياده عطوني مضاد حيوي وخذت الكورس

وخلصت واصح اسبوع والاسوبع الثاني ارد اتعب شو صاير فيني الله واعلم

صدق طحت طيحه مرة وحده والوالده الله يحفظها ماعرفت شو تسوي في وقامت تظهر لي حساسيه

بجسمي وزواع واسهال الله يعزكم

وكانت هاي اخر فتره من سنه ثالثه وبتبدا الاجازة والوالد الله يرحمه كان فالمانياا علاج والاهل كانوا ناويين

يزورونه وانا طبعاا

صحيت الحمدلله قبل السفر وسرت المانياا وزرت الوالد رحمه الله عليه

السفر كان اسبوعين اول اسبوع الحمدلله كنت صاحيه ثاني اسبوع انا طايحه ماروم انش من الحمى وكله زواع واسهال

ودوني اهلي المستشفى وقوولي فحوصات وقالولي احتمال فيج مرض الذئبه الحمرا واكمل فحوصات بالبلاد

رديت البلاد والكل منصدم اني ضعفت وايد وانا مب منتبهه لعمري تقريبا نزلت 15 كيلو خلال شهر

المهم رحت المتشفى بالبلاد قالولي فيج التهاب ورد الوالد بالسلامه البلاد وبدينا سنه رابعه طب وانا بعدني تعبانه

الوالده خافت ان فيني شي مب طبيعي

ودتني الله يحفظها عند مطوع في عجمان عشان يقرا علياا المهم رحت عنده تقريبا ع الساعه 10 بالليل

وعنده ناااااااس شكثر و زحمه ومايا دوري الا الساعه 1 وطبعا عقب واسطه

وانا بيني وبينكم ما أؤمن بهالخرابيط الا عشان امي رحت المهم قراا عليا وقال اونه فيني جن لابسني

المهم انا طبعا شقيت الحلج وماخفت ابداا واختي كانت ويايه الجبانه اتيبست مكانها لوول وامي مسكت

ايدي فديتهاا وعطاني دواا الله لا يراويكم جنه سم

واونه لازم اشربه كل يوم عشان يطلع مني الجن وارجع له مرة ثانيه

المهم شربت عشان امي وكانت تطلع روحي على طوول ازاوع ومفاصلي وايد كانت تعورني خصه

ركبي وكتفي ورسغي كنت ماقدر الله يعزكم اروح الحمام اتغسل كانت الخدامه تساعدني مع اخواتي ولا

اقدر امشط شعري ولا اقد اتحرك كل طايحه ع السرير

مالت علياا يوم شربت السم ماله طبعا فالبيت كانت حالتهم حاله عندهم استنفار بخصوص موضوعي

وانا وحليلي حالتي الله عالم بهاا الحراره ماتخووز عني ويابولي كذا مطوع وكل واحد يقولي شي وانا

والله العظيم موكله امري لرب العالمين واشوف المطاوعه عشان امي وابوي الله يرحمه

ماريد اتعبهم وكانت رحله فظيعه لين ما اكتشفوا فيني بالضبط شو عووقي الله يسلمكم اخوي تبرع لي

وداني الأردن عشان اسوي فحوصات عشان يشوفون شو علتي

عقب ماتعبوا من المطاوعه وخرابيطهم اذكر واحد قال حق اهلي اوني دايسه على مملكه من الجن وان

في كم جني حسبي الله عليهم من مطاوعه غش

سارت الاردن وترقدت عندهم بمستشفى الخالدي وشكوا في الخبيث وسووا لي عمليه خذوا فيها عينه

من نخاع العظم والحمدلله النتيجه طلعت سلبيه واخر شي شافني دكتور روماتيزم وقالي احتمال فيج

نوع نادر من الروماتيزم وعطاني مسكن ورديت البلاد على اساس ارجع له عقب طبعا سويت له طاف


وخف الويع عندي وطبعا طوول هالفتره ما كنت اداوم لاني ماقدر وبديت اداوم وانا يالله يالله اشل بعمري

طبعا اداوم متاخر على كيفي كنت

ومرة فالمحاضره يت دكتورة تسالني شو بلااي وعن التاخير ليش وقلت لها شو في من اعراض

وشافت ويهي وقالت اني وايد مصفره وفحصتني وقالت لي اروح الطواري عند دكتور روماتيزم بدبي

المهم الدنيا كانت اول رمضان سنه 2006

وداني اخوي الطواري وطبعا يبون يرقدوني بالمستشفى وانا طبعا معانده لأ يعني لأ والدكتورة المناوبه

تحاول في والدكتور يكلمني بالتليفون وانا معاانده المهم انا فزت وعطاني موعد مع عياده الوافدين

وطبعا يوم رحت الموعد خذت امي ويايه عشان مايرقدني بالمستشفى ويوم شافني اكد لي التشخيص

وطلب مني فحوصات للدم وايد اشياء والممرض مسكين كان يقولي افطري يابنتي لاحرج ع المريض

لاني الذكيه رايحه عندهم ويوم يقيس الضغط والنبض مالي ضغطي نازل طبعا ونبضي 160 احس حتى قلبي بيطلع

وحاول الدكتور يقنعني عشان يرقدني وقلت له لاتحاول

وبديت العلاج مع كورتيزون وكيماوي وحديد لانه صار في بسبب المرض انيميا حاده والحمدلله حالتي تحسنت وخفت الالام المفاصل والاعراض كلها تقريبا

وبلا خرابيط مطاوعه ولا شي

وامي ما كانت مصدقه اني مريضه كله حاطه فبالها ان فيني جني

المهم ردت لنشاطي وشيطانتي بالدوام

بس بمجهود اقل نظرا لظروفي الصحيه

تغيرت شويه يعني ماقدر اركب عتبات سلم وايد يادوب 4 او5 حدي ولا نفسي يقطع لازم لفت وكنت

اواظب ع المواعيد كل شهر فحوصات دم واخذ ادويتي ويوم بدا الدكتور يخفف الكورتيزون عني تظهر

لي الاعراض من اول ويدي ويضطر يرفعهم مرة ثانيه كملت سنه وانا مريضه حالتي مرة اوكي ومره

اتعب والحمدلله على كل حال........ والحين تعبت ماقدر اكتب اكثر بكملكم تجربه حياتي بيوم ثاني مع

الجزء الثاني وان شالله ما اكون طولت عليكم واتمنى ان الجزء الاول يعجبكم

الى اللقاااء

[الفارس العنابي]

تجربة مثيرة الصراحه وفيها كثير من الاحداث<<< اوني عاد

وما اتشوفين شر ان شاء الله و اتردين احسن عن قبل

تسلمين اختي على المجهود الطيب وبانتظار الجزء الثاني

دمتم

[Emiraty]

الله يعافيج دكتورتنا

وتسلمين على الموضوع

[بن عمـير]

الله يعطيج العافيه دكتورتنا

في انتظار التكملة

اخوج

[ريـمـي]

الله يشفيج وتردين نفس قبل وأحسن,,

ننتظر التكملة

[وصلاوي راك]

الله يشفيج و مشكورة على القصة المثيرة و بانتظار التكملة

[غبار الحب]

كيوت يالله كملي
باجي ست اياااااااااااااااااااااااااااااام واييج
الله على لندن ياخي متوله عليها ابى اجوف الربع
اجر وعافيه وقومه بسلامه

[عتيج الصوف]

When one door of happiness closes, another opens
but often we look so long at the closed door that we do not see the one which has been opened for us

.
.

لكن اعتقد انج لمحت الابواب المفتوحة و سارعت للخروج من ظلمة اليأس الى نور التفاؤل والايمان

نحن في منتدى الهدف نتشرف بانضمامج لنا

وانا شخصيا ً اتمنى اني اكتسب منج هذي القوة والصلابة والثقة في النفس

ما شاء الله عليج

تجربتج تستحق ان تكتب بماء الذهب

لج كل الاحترام والتقدير اختي .. والله يوفقج

[الـعقرب]

انا انصدمت ....

انتظر الجزء الثاني والنهايه عشان اعقب

[ديل بييرو الجزيرة]

دكتورتنا كيوتي
الله يعطيج الصحة و العافية
حسيت بشعور جميل يوم قريت الموضوع
بعض الجمل الي تبين انج راضية بالي صارلج
و سعيدة رغم حالتج الحالية
اسعدتني و خلتني ابتسم و شعرت بالراحة النفسية و الرضى

جميل يوم الإنسان يواجه مصاعب الدنيا بإبتسامة و رضى
هي افضل طريقة لمواجهة المصاعب و تذليلها

متابع للموضوع لأني اعرف اني بستفيد منه دروس كثيرة

[الكحيله]

ما شا الله عليج ..

تحديتي المرض و كل الظروف الصعبه ..

ونحن الاشيا الصغيره مب قادرين نتحداها و نتغلب عليها ..

ربي يحفظج و يخليج لأهلج و يبعد عنج كل مكروه يا رب ..

[mwaad3]

تجربة أليمة تتجرد من الألم.. لم يتبادر لذهني أبدا بأن هذه التجربة سوف تحمل معاناة أو مأساة..

بل كانت ترسم على وجهي البسمة بمواقفها البسيطة العفوية... ننتظر الجزء الثاني أخيتي..
علما بأننا قد تنبهنا للعبر في جزئها الأول..

أسأل الله العلي القدير بأن يشفيك..

[الملـــك]

ربي يسلمج ويعافيج يا رب ويشافيج من كل شر

بأنتظار الجزء الثاني

[عشقي احمر]

السلام عليكم

دكتوره كيوتي

سرد جميل للاحداث مع راضى كامل بما كتبة الله لكي احسدج على هذه الروح المعنويه التي تتحلين بهااا

متأثر بالقصه لدرجة الانفصام ( دمعت عيني ) متأثرا بما كتبتي اضفت الدعابة لكي تبيني لنا مدى رضاك عن الحالة

التي تمرين بهااا

بارك الله فيج

في الانتظار

[حلم الإمارات]

ما شاء الله عليج دكتورتنا يعطيج العافية ،،،

متابعة للموضوع وننتظر الجزء الثاني بشغف..