مشاهدة النسخة كاملة : معلومات عن مدينة العين


القلب الكبير
04-01-2012, 08:03 PM
السلام عليكم
اخترت عنوان الموضوع حتى يستدل عليه كل باحث عن المعلومات في المستقبل وباختصار ابا همتكم ياشباب باذن الله ناوي ازور مدينة العين هاليومين

حبيت اعرف بعض المعلومات مثلا شو اسم الشارع اللي تتركز فيه المطاعم وبعد الاسواق الشعبيه في اي منطقه وشو اسم الشارع

والمولات انا اعرف وزرت مول بوادي ومول العين بس الجيمي مازرته شورايكم يستاهل امر عليه ولا

حد عنده فكره عن المطاعم الموجوده في فندق ميركيور فوق جبل حفيت ويستاهلن الواحد ايمر عليهن ولا



هل طريق امبزره هو طريق فندق ميريكور لان عندي جهاز جارمن ماسويتله تحديث وماشي في الجهاز شاليهات امبزره بس في الجهاز فندق ميركيور جبل حفيت ؛؛ اذا نفس الطريق وعقب في ارشادات اتدلني على شاليهات امبزره عادي مب مشكله

ياجماعة ابا اطلع طريج المزراع وين اتكون اشجار النخيل ابكثافه وين هاي المنطقه وبأي جهه من العين ، يعني مافي مكان الواحد ايشل غداه وياه ويسير يستظل بمكان بس ترا عندي صالون

هههههه اخوكم في الدروب والله اهنه هههههه اخر مره عقب ماخلصت زيارتي للعين من سنتين ويا الاهل اتقولي الحرمه اتدل طريج الرده قلتلها ;):aa_boz: افا عليج مرررره لاتحاتين


ماشفت عمري الا على معبر حدود عمان :aa_drive:

مشكورين مقدمآ

القناص الجزراوي
04-01-2012, 08:31 PM
خبرتي بالعين مب لهناك بس بقولك اللي أعرفه

لو رحت لدرب المبزرة تقدر توصل للشاليهات , و المطاعم في العين منتشرة مب في مكان معين !

تقدر تقول في عدة أماكن

شارع خليفة بن زايد أتوقع فيه عدة مطاعم مثل بيتزاهت و ماكدونالدز

أما و أنت ياي من صوب بوظبي و تلف دوار الجبل يسار هني تلقى كنتاكي و راشد علي و شووية مطاعم منوووعة ! منها مطاعم الكرك و منها الكافتريات العادية و منها من نوع كنتاكي !

من ناحية المولات أتوقع بوادي أحسن مول للحين !

العين مول فيه توسعة و أتوقع بعد التوسعة بيصير أحسن من بوادي , خلصوا القسم اليديد من فترة بس مدري إذا فتحوه و لا بعده !

و اسمحلنا عالقصور

FoRZa . MiLaNo
04-01-2012, 11:26 PM
الشارع اللي تتركز فيه المطاعم في العين ,, شارع خليفة .. كل شيء بتحصل فيه ... بحري او لبناني او فاست فود

فندق ماسرتله من قبل وماعتقد فيه مطاعم هناك , بستثناء مطعم الفندق

بس شو تباه هالفندق , احجزلك شاليه في مبزرة احسلك :)

طريق مبزرة نفس طريق الفندق , يعني انته تيي من درب الصناعية

كمل دربك جنك تبا الفندق بتحصل اول دوار كمل سيدة ولا تاخذ يسار

اذا سرت يسار بتروح الفندق يعني جبل حفيت

اذا كملت سيدة بتدخل مبزره ..

طريج المزارع ؟؟؟؟؟ ماينفع بتحصل قوم بو خنه وبتان هناك ... قطاع طرق خخخخخخخخ

بالنسبة للمولات , البوادي زين بس بعيد شوي , خارج المدينة

الجيمي مول في قلب المدينة النابض ودايما زحمه

العين مول عقب التوسعه صار رائع جدا

واذا بغيت اي شيء فالعين ما يردك الا لسانك ... طرشلي رسالة ع الخاص اذا بغيت شيء

وحاضرين للطيبين :)

القلب الكبير
04-02-2012, 12:42 AM
مشكورين على المرور ويعطيكم العافيه القناص الجزراوي ، FoRZa . MiLaNo

شباب الفندق فوق فيه يلسات خارجيه حق كوفي ويا الاهل ولا ماتنصحون ، وشو احسن مطعم شامي ووين يكون بالضبط السؤال للجميع

مليون شمعه
04-02-2012, 01:27 AM
الفندق عندهم ثلاث مطاعم درجه اولى

وواحد منهم يقدم اكل لبناني وايطالي الخ ويطل على منظر المسبح

مذكورين بموقع الفندق



اما اذا قصدك مطاعم شاميه ثانيه بمناطق ثانيه مب في الفندق



عندك الصفدي والخروف الذهبي الاثنين بشارع خليفه وفي غيرهم

وعندك الملاح والروضه في المويجعي





والاسواق الشعبيه مادري شو قصدك بس شي سوق الزعفران هو تصميمه شعبي تقليدي لكن يحتوي على محلات نسائيه ورجاليه حديثه

aion
04-02-2012, 11:29 PM
عليك بالملاح الي فسوق المويجعي اكله طيب و اسأل فورزا ميلانو عنه ولا شو تقول بو عبيد ؟

RN9
04-03-2012, 01:20 AM
الشباب ما قصروا خصوصا فورزا وما عندي اضافه غير عن مطعم زست الي في فندق روتانا عيشته طيبه ويلسته هاديه وماشي صدعه فيه.

العين مول صار افضل من بوادي ومتروس كوفيهات ومطاعم تنقى واختار.

ميركيور فيه قعده عالمسبح بس ما جربته الصراحه.

للاسف العين رغم كونها مدينه تراثيه لكن لحد الحين مافيها سوق شعبي بمعنى الكلمه رغم انه لو موجود بينجح بشكل كبير

درب السلامه واي شي محتاينه احنا حاضرين عالخاص ولا في موضوعك.

crown
04-03-2012, 09:44 AM
رباه على أيام العين

لها معزة خاصة في قلبي هالمدينة

عيناوي هايم
04-03-2012, 10:47 AM
عن الاسواق الشعبيه فالعين ما تقدر تقول ان في اسواق شعبيه شعبيه

بس عندك سوق الزعفرانه بالخبيصي مدري والله هل يصنف من الاسواق الشعبيه ولالا

سرتله ويا الوالده مره بس ما حسيت انه شعبي
بس فاذاعه اف ام اسمعهم يقولون سوق الزعفرانه الشعبي ..

عالعموم عن فندق ميريكور فيستاهل انك تزوره الصراحه شي.. يعني حتى لو الواحد خذله غرفه هناك الدرايش تطل على منظر غيييير

وعن افضل المطاعم فالعين عندك فشارع خليفه رقم واحد الخروف الذهبي وعندك الشوكه الذهبيه والصفدي بس انصحك بالاول ..

وعن المبزره وجبل حفيت واللي فيه الفندق وعين الفايضه واللي فيها الحديقه المائيه الجديده كلهم فمكان واحد ودربهم واحد وما بتضيع

وعن المولات عندك فالمرتبه الاولى البوادي مول وايضا العين مول بعد التوسعه اصبح شي خيالي + الجيمي مول وشي مول يديد اسمه صروح مول مدري اذا خلصو منه ولالا

عالعموم اتمنالكم رحله جميله ..

TaO
04-03-2012, 06:08 PM
عندك مول الفوعه قريب وفاضي وكل شي فيه <<<< نبى نربح مولنا

LiL Boss
04-03-2012, 06:21 PM
يااااه ع العيــــن دار الزين

اذا لندن مدينة الرومنسيه ف اوروبا

العين مدينة الرومنسيه في الامارات:wu:

مكان هادي وبعيد عن الزحمه .. و الحمد لله بتحس انك ف الامارات ..
المواطنين في كل مكان والحمد لله

فنادق : روتانا :عدال السوق وسوووق فيه كل المطاعم مثل ماقالو الاخوان واقرب مول له اهو العين موووول
هيلتون :بعد عدال السووق .. واقرب مول له بوادي مووول . واسع وحلو وكل شي فيه متوفر واحلي مطعم فيه (( فرايديز )) ^_* وبعد العين مول جريب لاكن عن زحمة السوق
ابيلا: ف الجيمي وجريب منه راشد علي مطعم مفضل لهل العين هههه واقرب مول له الجيمي موووووول واحلي مطعم ف الجيمي (( جليز )) هع
الماسه :فندق متوسط وجريب من الجيمي مول وبينه وبين المول اشارتين مرور هع بس


الاماكن السياحيه : لمبزره والجو هاي الايام حلوه ف العين دق موترك سلف وعلي قمة حفيت روح وخل الهوا الطيب ينسم عليك
الحيوانات : .. حلوه العروض فيها حق الاهل
بدع بنت سعود ف منطقة الطويه وهناك زهب الفور ويل وشل الاهل مكان حلو وبر والجو هاي الايام روعه

اخر شي هات يوازك وسير البريمي عند هل السلطنه وغير جو لاتحاتي ترى الحدود (( مطبه)):aa_italy2: وشوية زحمه


المستشفيات لاقدر الله لاكن للحايه :aa_rip::

مستشفي العين (( الجيمي)) الطرف الثاني من الجيمي مول وفندق الماسه لاكن ع سيد المول عيادة عود التوبه:aa_Dance2:
مستشفي الواحه قريب من بوادي مول وفندق الهيلتون والعين مول حذال نادي العين استاد خليفه بن زايد هب القطاره

ورب لك حافظ

فخر الزعامة
04-03-2012, 07:45 PM
عندك اليحر , من اجمل المناطق في العين



خخخخ

الأخوان ماقصرو وياك

LiL Boss
04-03-2012, 11:12 PM
عندك اليحر , من اجمل المناطق في العين



خخخخ

الأخوان ماقصرو وياك

ههههههههههههههه ياريال خف شوي

خله يروح يدق بلخمس ف مطبخ اليحر هههه

LiL Boss
04-03-2012, 11:15 PM
هيه وزيدك اذا كنت ف السوق

مستشفي النور ع يمين الكنتاكي
ويوم تتوكل من عندهم دايسو جدامك :aa_www: مواعين تايم ههه

القلب الكبير
04-04-2012, 06:30 PM
مشكورين سرنا وردينا بالسلامه سكنت في امبزره بس يبون حد يشتكي عليهم يعني مافي صيانه مستمره خاصة للمكيفات صدعنا ايوعي الصغاريه من عز ارقادهم من صوته غير مافي تطوير للخدمات المفروض يفتح مطعم على مستوى يغني الواحد عن امحاتات الاكل

والصراحه لي ملاحظه عقوم بوطعش لايحشمون ولاشي حتى لو حرمه امنقبه يطالعون من تحت لي تحت و وايد دازين بالويه في امبزره ووايد صارت معاكسات وعقبها مشاكل ، وحده ياهل مستعيله على الخراب وستة عشر الف مفلوع وراها واللي ايعور القلب انها ساحبه اختها وياها اختها ماتعدت يمكن 13 سنه

الدرويات سايره راده اظني يتريون ايخلص الدوام

وفي شباب الله هادنهم حشمه ورزانه على العموم تبقى العين وجهه مفضله عندي ومشكورين على المشاركه والردود

ĂłҙıпMıяαсłє
04-05-2012, 01:35 AM
الشباب ما قصروا خصوصا فورزا وما عندي اضافه غير عن مطعم زست الي في فندق روتانا عيشته طيبه ويلسته هاديه وماشي صدعه فيه.

العين مول صار افضل من بوادي ومتروس كوفيهات ومطاعم تنقى واختار.

ميركيور فيه قعده عالمسبح بس ما جربته الصراحه.

للاسف العين رغم كونها مدينه تراثيه لكن لحد الحين مافيها سوق شعبي بمعنى الكلمه رغم انه لو موجود بينجح بشكل كبير

درب السلامه واي شي محتاينه احنا حاضرين عالخاص ولا في موضوعك.

عندك السوق المركزي اللي عدال سوق الذهب وورا محلات الرياضه خخخ

Adsense Management by Losha