مشاهدة النسخة كاملة : مهارة الريوس ( بدون كاميرا ) !!


عتيج الصوف
06-25-2011, 05:27 PM
يوم الخميس عقب المغرب ,,
كنت أيوول في باركنات دبي مول أدور لي باركن للسيارة !
وطبعا ً أفضل يكون جريب من مدخل ريل سينما ,,

فجأة شفت السيد واقف !
والسيارة اللي قبلي تضرب هرنات بشكل متواصل !
والسيارة إللي جدامها تحاول تركن في الباركن الفاضي ,,
بس مب رايمة تاخذ الوضع الصحيح !

بعد إنتظار حوالي دقيقتين ,,
نزلت من السيارة أشوف الموقف عن كثب ,,
شفت بنت عندها ستيشن ومختبصة بالقوو !
تحاول تدخل موترها في الباركن ومب رايمة !

طبعا ً إهنه الدفاشة مرفوضة !
لذلك ,,
ما عرضت عليها مساعدتي !
لكني إستفزيت من موقف راع السيارة إللي يضرب هرنات !
شكله ( هندوسي ) يبا يربكها عشان تترك الباركن له !
لذلك ,,
وقفت أساعدها من خلال الإشارات !
لكن مشكلتها ,,
إنها تحاول تدخل الموتر بالتقدم للإمام !
مع إن وضعيتها تتطلب إدخال السيارة ( ريوس ) !

بعد عدة محاولات شفتها تطالعني ,,
وحسيت الوقت مناسب لعرض المساعدة !
فبادرت بعرض المساعدة :

أنا : ممكن تخليني أدخل الموتر ؟

وحليلها , ما جاوبت حتى !
سيدة , نزلت من الموتر هي وإللي وياها !
و رجعت بالسيارة ( ريوس ) داخل الباركن !

الهندي ,,
شكله إنحبط !
و عطى موتره ريس !
ونفد !


الشاهد ( الأول ) في الأمر ,,

أحيانا ً بعض المواقف تستدعي عرض المساعدة !

ولكن ,,
عرض المساعدة هذا يتطلب ( إتيكيت ) معين
حتى تمر الأمور بسلاسة !
ودون أي إحراج أو فهم خاطئ !

الشاهد ( الثاني ) في الأمر ,,

ما توافقوني الرأي !
بأن مساحات الباركنات !
تعتبر صغيرة بالنسبة للسيارات الفورويل ( العائلية ) !
يعني حتى لو وقفت بشكل نموذجي ,,
تحس فيه صعوبة في فتح الأبواب بمساحة كافية !

الشاهد ( الثالث ) في الأمر ,,

إختبارات الحريم !
لازم يتم التشديد فيها على مهارات ( الوقوف ) !
و ( الرجوع للخلف ) !
لأن هذي المواقف تتكرر بكثرة !

الشاهد ( الرابع ) في الامر ,,

القيادة أخلاق !
وفئة كبيرة من مرتادي الطريق ,,
يفتقدون لهذه الأخلاق !

الباركن ممكن يتعوض ,,
لكن إحترامك لنفسك ,,
من الصعب تعويضه !

,

دمتم سالمين

:)

عتيج

ام الوفا
06-25-2011, 05:44 PM
ههههه

وحليلها حسيت فيها اكيد كانت في موقف لاتحسد عليه وبالاخص اذا وترها حد من وراها
بالنسبه لي ما ابركن ريوس الا اذا شفت المكان خالي عشان اخذ راحتي وما اتعرض لموقف محرج
وعشان محد يقول شفتواا ما قلتلكم طلعت حرمه اللي تسوق خخخخ

وفعلا في وااايد تنزل اخلاقهم للقاع عند باركنات المولات وقت الزحمه واتفق وياك باركنات المولات فدبي ضيجه :(

Pentagon
06-25-2011, 05:46 PM
صــار لي سنــة ما خذ الليسن لكــن أواجه صعوبــة جدا في الريوس ,,

أختبص خبــص من ناحيــة تقدير المسافــة بين سيارتي والسيارة الي وراي و المسافة المطلوبة لكســر السكـان حتى أدخل السيارة بشكل سليـم في الباركـن,,

شكــرا لـك

Marco Van Basten
06-25-2011, 06:44 PM
أوافقك الرأي فيما يتعلق بباركنات دبي مول فهي ضيقه خاصة للي عندهم فوريل المفروض قياسات الباركنات تكون متوافقة مع جميع انواع السيارات بالنسبة لسواقة الحريم في الشوارع اشوفها جيده الحريم يتقيدون بقواعد المرور اكثر من الرجال أكثر الي يلفون عليك في الشوارع رجال لكن فيما يتعلق بالباركنات بعض الحريم عندهم خلل خاصة في الباركنات الضيقة تلاقيها مختبصة وماعارفة شوتسوي وهذا الموقف حصل جدامي أكثر من مره في باركنات المولات في احد مولات دبي حصل جدامي موقف بنت تحاول تبركن وماعارفه تضبط الباركن تدخل الباركن وترد تطلع وواحد ورى يضرب هرن مستعجل هي من الارتباك طلعت من الباركن وخلته طبعا الي وراها هو المستفيد بس ها الايام أغلب السيارات فيهن كاميرات تسهل عليك الوقوف بشكل صحيح

احسـآس
06-25-2011, 08:02 PM
مستحيل اروح دبي بمول بستيشن
اصلا تادبت !
مرة عقب ما طلعنا حصلت الموتر مشحوف شحف
اسميني تغصصت والسبب مثل ما قلت الباركنات ضيجة وايد ,
اتفق معاك بجزئيةاختبارات الحريم
وفعلاً مثل ما قلت القياده فن وذوق , لكن نادراً ما نشوف
الذوق في هالشوارع خصوصاً لو كانت مزدحمه !


:25:

فلاسية أصلية
06-25-2011, 08:10 PM
الحمدالله من خذيت الليسن وانا احاول اتعلم ادخل الموتر ريوس الين ما ضبط 100%
ابويه حالف ما اتعلم يا عتيج الا على قير عادي :7btaain:
حتي الشباب عدنا بالدوام يعلقون على البنات الي يوفقون ريوس !! تفكير ضيق من جهتهم .
وبصراحة ما احبذ سواقة السيارات العائلية الكبيره :aa_drive:

sweetness
06-25-2011, 08:13 PM
التبركين عقده الحريم :aa_knock: مشان جي اول ما اخذت الليسن يبت كيا بيكانتو قلت احترم نفسي واخذ سياره صغيره اتدرب فيها ولا يستويلي ها مواقف
والحين اسوق سياره الاهل نيسان ارمادا والحياه حلوه التبركين في ثواني حتي لو ريوس :aa_clab:

قلب الأمير
06-25-2011, 08:30 PM
من الأسباب اللي خلتني أعشق "الجيب" خخخ

صغيرة
و حلوة
و سبورتية
و قيادتها سهلة و على كيييف الكيفك بعد



و عن الكاميرا
حتى "بالانفنتي" ما أطالعها , أبركن بالريوس و انا أطالع المناظر الجانبية

و حتى بموتري الفورويل الثاني
أبركن عالريوس غااالباً بالسكن و بسهولة الحمدلله , و باركني مميز و عند الباب سيدة بأغلب الاوقات ,
روحي اللي ابركن عالريوس و الباجين كلهم مبركنين ع جدام , إلا مرات أشوف البعض يقلد و جي خخ


و يلا عشا تاايم

رجال الفلاحي
06-25-2011, 08:37 PM
السلام عليكم

انا ما امتحنت ريوس وباركن (ايام العز)
وتوني من كم شهر بديت اهتم بالوقوف في الباركن بشكل حضاري !
عموما المهارة تحتاج لصقل بس

دمتم

Pentagon
06-25-2011, 08:41 PM
كل الأجانب يبركنــوا سيارتهم ريوس ,, من بــاب الـ Safety

نبغــي حملــة بركنهـــا ريوس >>> 80 % من الحريــم سحــب ليســن :haha2:

عيناويه نعم !
06-25-2011, 08:43 PM
اصعـــب شيء الباركن بصراحه !

و مازالت محاولات الوالد اليائسه ف تعليمي

لكن لا يأس مع الحيــاة


شكراً ع الطرح ؛

قهوتي ساده
06-25-2011, 08:49 PM
باركنات المولات دائماً تكون ضيقه , وتضيق يوم يكون المول زحمه واللي واقف عدالك يكون واقف غلط وماخذ مساحه من موقفك اللي اونك بتبركن فيه , وين بعد لو كانت استيشن وحرمه تسوق وموقف ( السيد ) اللي وراها وجدامها صعب وزحمه ولازم تبركن ريوس فأكيد بتتوهق .. اشكرك يا عتيج على حلك السريع للمشكلة , بس انا استخلصت من موضوعك شي ثاني وهي موضوع (الهندوسي ) هل هم سيئين وانانيين لها الدرجه ويكرهون المواطنين .؟؟

روح الزعيــــم
06-25-2011, 09:36 PM
اشكرك بصراحه يا عتيج ،، طلعت البنت من وهقه !!

يا هيك الرجال يااا بلااا

اذكر ربيعتي كانت تسوق سياره فور ويل وودها تبركن في بركنات المنار

شو ما اختبصت خبصه وفوق هذا وذاك اللي واقفين وراها شبابنا لكن لا سياره الاولى فكرت تمد ايد العون ولو من باب الاشاره ،، بعد مانزلت و وقفت بطريقه مؤسفه تكرم 3 سياره واقفه وقال بعدلها لج !!

هذا ما غير باركنات القيصر ،، هناك عاد الشباب مبركنين وراها ومخلينه مسرحيه البنت تبا تدخل الباركن ومب قادره لا شي سياره واقفه غلط !!

علمهم اصول المساعده قبل اصول الاتيكيت يا عتيج ،، هييييهاا ع الهنود فبلادهم ستين الف واحد بيساعد ان حد " انزنئ"

،،

بعدين اشله الكلافه وباركن ريوس وو ،، بركن عادي وخلاص واعتقد ان فمتحان الليسن الباركن يكون عادي مهوب ريوس !!

يعطيك العافيه استاذي

:25:

يارب خير
06-25-2011, 09:41 PM
اقول ليش من قبل ما ادخل مدرسة التعليم وابوي وامي يعلموني الباركن بالريوس !!

وبكل أمانه كان بالنسبه لي شي متعب والاكثر من هذا انك يوم تتعود ع سياره معينه تستصعب السيايير الثانيه حتى لو كانت اصغر ..

السيارة اللي نتعلم عليها السواقة في البيت مافيها كاميرا ولا سنسر حتى .. في البدايه كان عندي انطباع اني بدعم اي شي .. ومع التعلم والتعود صارت السيارة المفضله

وانا انصح كل البنات يتعلمن ع سيايير مافيها سنسر لأنه يعدم اساس السواقه واللي هي استيعاب ابعاد السيارة ومحيطها ..

الشباب ماشاء الله عليهم اي سياره يقدرون يسوقونها .. بالدم تجري السواقة

واللي يبا يتعلم الصبر يسوق :aa_hang:

عسى فعلك فميزان حسناتك .. يزاك الله خير وربي يعطيك العافيه

:)

Zrrr
06-25-2011, 09:44 PM
نفس الموقف استوالي في دبي بس الصراحه انحرجنا

كانت جدامي تبا تبركن ريوس و على صوب الباركن ف مسويه زحمه حوالي دقيقتين او ثلاثه طولت و هرنات وخبصه

قلتلها الشيخه تبيني ابركن السياره قالت هي تعال قلت حق ولد عمي يالس عدالي انزل بركن السياره المسكين نزل وبركن يوم ردلي ويها متغير

قلتله شو فيك قال @_@ السياره ممزوره بنات ماعرفت ابركن يا ريال .. نيسان فتك

والبنات مستانسات بس ما بكمل :aa_crazy:

FoRZa . MiLaNo
06-25-2011, 10:18 PM
^

زرررر

عاد عقب ما قالك ولد عمك جي , اكيد قتله يا نذل ليش ما خليتني اروح :haha2:

-------

البنات وايد يرتبكن وبصراحه فالسواقه مييييح ميييييح

يعني عادي ماسكه خط السرعه وتمشي 60 , واذا ديمتلها بترتبك اكثر ويمكن تلف ع اللي يمينها ويصير حادث لا تحمد عقبااه

بعتقادي يسوقن السياره وهم في حالة سرحان وبدون تركيز

DR@GON
06-25-2011, 10:26 PM
الشاهد (الخامس) في الأمر

ان هناك جاليات أجنبية خاصة الهنود ،،
يجلس الهندي في سياراته يمكن لمدة ساعة ،،
عندما تأشر له يقول لك انه لن يخرج الآن ،،
وفجأة تأتي سيارة اخرى فيها جالية هندية ،،
يفسح لهم المجال ليأخذوا مكانه ،،
كأن هذا البركن ملكا لهم يورثونه ،،
يورثونه لاهاليهم واصدقاءهم !!
وانت قد تنتظر بالساعات لتجد بركن اخر !!

شكرا اخوي عتيج الصوف على الموضوع الرائع ،،

احسـآس
06-25-2011, 10:48 PM
الشاهد (الخامس) في الأمر

ان هناك جاليات أجنبية خاصة الهنود ،،
يجلس الهندي في سياراته يمكن لمدة ساعة ،،
عندما تأشر له يقول لك انه لن يخرج الآن ،،
وفجأة تأتي سيارة اخرى فيها جالية هندية ،،
يفسح لهم المجال ليأخذوا مكانه ،،
كأن هذا البركن ملكا لهم يورثونه ،،
يورثونه لاهاليهم واصدقاءهم !!
وانت قد تنتظر بالساعات لتجد بركن اخر !!

شكرا اخوي عتيج الصوف على الموضوع الرائع ،،


والله يبتها صح :aa_emghater:

sweetness
06-25-2011, 11:19 PM
^

زرررر

عاد عقب ما قالك ولد عمك جي , اكيد قتله يا نذل ليش ما خليتني اروح :haha2:

-------

البنات وايد يرتبكن وبصراحه فالسواقه مييييح ميييييح

يعني عادي ماسكه خط السرعه وتمشي 60 , واذا ديمتلها بترتبك اكثر ويمكن تلف ع اللي يمينها ويصير حادث لا تحمد عقبااه

بعتقادي يسوقن السياره وهم في حالة سرحان وبدون تركيز


:aa_knock: لا تعمم ترا انا لي دومي امشي على خط سريع والناس قدامي لي ماشين على بيض ومهما حرقت فل ليت عليهم ما يخزون لين ما اتجاوزهم, :aa_hang:
الله يرحم الكيا لما اوصل 160 اتقول سياره خلاط في شارع :aa_clab: لول الوحده لازم تيبلها سياره طبلونها فوق 260 :aa_crazy:

SharjawiaH
06-26-2011, 12:55 AM
حليلها .. وترها الريال ..

عن نفسي .. ما اعرف ابركن عادي .. الا الريوووس p4: .. وها الشي تعلمته من بنت عموه ..

والباركن الجانبي ... من المستحيلات اني اتعلمه !!!!!! :aa_ops:


:25:

غو يّه
06-26-2011, 03:24 AM
والله فيك الخير يا عتيج !
والله يزيد من أمثالك !

وع طاري السواقه والباركن استاذنا كندي
ايقول كل الحريم اللي فالعالم يشتركون فنقطة السواقه !
يقول لازم انشوف حرمة فيها خلل فالسواقه خخخخخ
وبصراحة قنعني ميه بالميه خخخخ

الموهيييم فهمونييي !
ليش يعني الباركن بالريوس سيفتي اكثر ؟!!
وليش يوم الموتر امبركن بالريوس ياخذ مساحه اقل ولا كيف !!
يعني اشوف اللي يبركن بالريوس بس احسه دلع وخقه خخخخ
هل له فوايد ثانيه !
بصراحة ما فهمتش !p4:

شرحووووووولي >> شخص يتمنى يحصل ليسن ولو فالحلم :aa_trs:

تحفه
06-26-2011, 03:51 AM
عتيج .. انقذت البنية في الوقت المناسب لانها اكيد كانت فقمة التوتر والارتباك
> مرينا بموقف مشابه وباستيشن ويانا فاعل خير وتبرع يبركن .. ونزلنا من السيارة كلنا والسنتنا تلهج بالدعاء لهالانسان p4:

وأأيدك فانه لازم يشددون فاختبارات الحريم للباركن والريوس .. لانه هذي مشكلتهم العظمى في السواقه
ومثل ماقلت السواقه فن واخلاق .. وسبحان الله من سواقة الشخص تبين بعض اخلاق ونفسيات الاشخاص

شكرا :)

AFROJACK-1
06-26-2011, 03:58 AM
فالفترة الاخيرة المرور قاموا ينجحون من هب و دب في سبيل انهم يرفعون عدد المخالفين ‘
الله يرحم ايام اول يوم كان الليسن يعتبر انجاز !

عموما الهندوسي واحد حقير ’ حاله حال الي ظلم هالبنية يوم نجحها :25:

عتيج الصوف
06-26-2011, 08:02 AM
أنا أشوف إن البنات عندهم حلين :

1- ما يشترون إلا السيارات إللي فيها كاميرا خلفية
2- ما يشترون إلا السيارات الصغيرة جدا ً

,

دمتم خلوقين
وشكرا ً لكم جميعا ً على المرور

:)

عتيج

Hili
06-26-2011, 08:24 AM
من الأسباب اللي خلتني أعشق "الجيب" خخخ

صغيرة
و حلوة
و سبورتية
و قيادتها سهلة و على كيييف الكيفك بعد



و عن الكاميرا
حتى "بالانفنتي" ما أطالعها , أبركن بالريوس و انا أطالع المناظر الجانبية

و حتى بموتري الفورويل الثاني
أبركن عالريوس غااالباً بالسكن و بسهولة الحمدلله , و باركني مميز و عند الباب سيدة بأغلب الاوقات ,
روحي اللي ابركن عالريوس و الباجين كلهم مبركنين ع جدام , إلا مرات أشوف البعض يقلد و جي خخ


و يلا عشا تاايم

يا جماعه مطوعنا فلتة زمانه :h3:
بعدين شو معناة هالكلام الي لونته باللون الأحمر .. يعني تبركن وتجّحّل عيونك!! وين غض البصر والمعلقات الي تتحفنا بهن :aa_feshay: .. مطاوعة آخر زمن :aa_boxat:

Foxie
06-26-2011, 09:04 AM
بكـل بساطة وسهـولة ..

اللي ما يعرف يوقّف سيارته ( ريوس) ..

يسير الفاليه بـاركنغ وهم بيتكفلون بكـل شي لوول =)

عيناوي أصيل
06-26-2011, 09:59 AM
[SIZE=4]الشاهد ( الأول ) في الأمر ,,

أحيانا ً بعض المواقف تستدعي عرض المساعدة !

ولكن ,,
عرض المساعدة هذا يتطلب ( إتيكيت ) معين
حتى تمر الأمور بسلاسة !
ودون أي إحراج أو فهم خاطئ !

السؤال هل عرض المساعدة هذا مقتصر على فئة الحريم أم للجميع؟

عموما ربعنا راعين فزعة ومايقصرون

الشاهد ( الثاني ) في الأمر ,,

ما توافقوني الرأي !
بأن مساحات الباركنات !
تعتبر صغيرة بالنسبة للسيارات الفورويل ( العائلية ) !
يعني حتى لو وقفت بشكل نموذجي ,,
تحس فيه صعوبة في فتح الأبواب بمساحة كافية !

المواقف ضيقة في كل مكان حتى لو عندك صالون طويل مرسدس أو بي أم مثلا، أعتقد والله أعلم إن السبب في ذلك أن معظم المهندسين بتحصل عنده كورولا أو سني أو تيدا وإذا كان senior engineer بتحصل عنده برادو، لذلك بيسوي قياسات الموقف حسب الي هو متعود عليه، بالإضافة إلى متطلبات المستثمر بتوفير أكبر عدد ممكن من المواقف

الشاهد ( الثالث ) في الأمر ,,

إختبارات الحريم !
لازم يتم التشديد فيها على مهارات ( الوقوف ) !
و ( الرجوع للخلف ) !
لأن هذي المواقف تتكرر بكثرة !

غريب أخوي كيف ياي على الحريم هالمرة ؟ الموضوع عند الجنسين خاصة الآسيويين

الشاهد ( الرابع ) في الامر ,,

القيادة أخلاق !
وفئة كبيرة من مرتادي الطريق ,,
يفتقدون لهذه الأخلاق !

الباركن ممكن يتعوض ,,
لكن إحترامك لنفسك ,,
من الصعب تعويضه !

,

ياخوك الحينه الأخلاق مب بس مفقودة في الطريق ....
دمتم سالمين

:)

عتيج


الغريب في الموضوع إن الوضع عادة ما يتم عليه، يعني ما إعتقد إن البنت الي كانت تعاني مع الموقف سارت وتدربت على "الريوس" سواء مع مدربة أو حتى بروحها عدال البيت

من تجربتي الشخصية وبعد إنتقالي لبوظبي إنتقلت من مرحلة الجيد جدا إلى محترف مع الممارسة الحمد لله وما شاء الله عليه ههههههههه

عيناوي أصيل
06-26-2011, 10:02 AM
الشاهد (الخامس) في الأمر

ان هناك جاليات أجنبية خاصة الهنود ،،
يجلس الهندي في سياراته يمكن لمدة ساعة ،،
عندما تأشر له يقول لك انه لن يخرج الآن ،،
وفجأة تأتي سيارة اخرى فيها جالية هندية ،،
يفسح لهم المجال ليأخذوا مكانه ،،
كأن هذا البركن ملكا لهم يورثونه ،،
يورثونه لاهاليهم واصدقاءهم !!
وانت قد تنتظر بالساعات لتجد بركن اخر !!

شكرا اخوي عتيج الصوف على الموضوع الرائع ،،

أخوي سو شراتي أنا خبرة في هالموضوع

من تشوفه يسوي هالحركة تعال وإصفت جدامه "سكر عليه" وانزل من السيارة والبسه بيموت قهر وبتم يزقرك سير سير سير انت قول سير لا

هالحركة الحمد لله مسوية شغل ويايه ومعلم الهنود الأدب

ALBAROON
06-26-2011, 10:37 AM
قوي ياعتيج ,, وحششش ,, :haha2:

اتكيتك بعد هاااه ,,

على العموم مشكلة المرأه المُزمنه .. الباركن

ولازالت العقده مستمره

Adsense Management by Losha