مشاهدة النسخة كاملة : أبحث عن (( أقذر )) مطعم في الإمارات ..!؟


أبو الأمريكية
10-06-2007, 03:25 PM
:uns:




ياجماعة لاتفهموني غلط ..
الواحد منا يحب يسير الأماكن والمطاعم والكوفيات الراقية ..
بس لازم يوم إيه نوع من التواضع ..
وأنا دومي ولله الحمد متواضع ..

:bwroo:

وبصراحة يعيبني أكل من مطاعم مب واااايد (( قذره )) بس مب قد المقام يعني ..
يعني الكشكات .. واللي ديكورها على قدها ..
أدري إن ورا السواهي دواهي ..
لكن الواحد المفروض مايخلي شئ في خاطره ..

:blu:



هااا حد منكم يقترح مطعم بسيط لكن أكله فنان ..!!


:soc:

bin3li.ae
10-06-2007, 03:39 PM
راع السمبوسة- مطعم متجول على سيكل

بوخليفة
10-06-2007, 03:41 PM
تبا مطاعم عائلية ولا شبابية ..... إذا شبابية .. وفي الشارقة .. في المصلى عندك مطعم كباب على كيف كيفك ..
وعنده اظني الحين فرع جديد تقدر تقول عنه راقي عند حديقة المجاز وفي مكان خاص للعائلات في الدور الثاني ...

مطعم صدف بعد حلو وعائلي والحين جددوه من داخل من ناحية الديكور وصار فعلا مكان جميل وهو مطعم هادي واكله ممتاز...

مطعم البوم بعد اللي عند القهوة الشعبية آكله طيب ...

المطعم الكبير تقدر تقول عليه شبابي ما ينفع حق العائلات والمشاوي اللي عنده زينة .. وعليك بالفتوش مالهم والشوربة وخله يكثر من العظام....

وعندك مطعم الكروم اللي عقب إستديو الزورق يسوي لك سندويشات على كيف كيفك خبز لبناني كبير يوم تشوف السندويشه تخاف ووحده تشبعك....

وعلى بحر الشارقة .... روح مطعم النبع ..... جرب سندويش الناشف ماله ولا الربيان ولا بطاطا باذنجان ... وعقب ما تطلب بس تجدم 100 متر كافتريا تايلوس وخذ لك واحد كوكتيل فرش وسط بـخمس ريال....


وإذا تبا بوفيه اول البحيرة مطعم دانيال بس ما ينفع حق العائلات لأن ما فيه بارتشين ... اوبن بس حق الشباب ترتيب وسعره معقول ...

وفي مطعم في الناصرية وانت داخل من صوب الباور هوس ... تطوف كافتريا بالخير تكمل سيده على اديك اليسار بتشوف مطعم الإمارات ... هذا اظني كان راعيه يشتغل في البر والبحر آكله بعد زين وعنده اماكن حق العائلات ....

وفي مطعم عقب ما ا تنزل من جسر الخان ساير صوب المنتزه .. على اديك اليمين في مطعم هندي انا جربته لكن ما اعرف شو اسمه آكله لذيذ واحلى من قصر الهند وهو مطعم مب راقي ولا انه عادي يعني تدخل تقول فوق المتوسط ...

بسني يا بوشيخه تراك يوعتني ..... بكمل عقب إن شاء الله ...

kH@LiD
10-06-2007, 03:46 PM
وفي مطعم في الناصرية على وانت داخل من صوب الباور هوس ... تطوف كافتريا بالخير تكمل سيده على اديك اليسار بتشوف مطعم الإمارات ... هذا اظني كان راعيه يشتغل في البر والبحر آكله بعد زين وعنده اماكن حق العائلات....

قول ورا مستشفى زليخه وفك عمرك :blu:...

أبو الأمريكية
10-06-2007, 03:47 PM
والله يابن علي ..
إنه راعي السمبوسه أدوره دواره ..
ومب محصلنه ..
يوم يقولي زخوه البلدية ..
ويوم سافر ..
وهلم جرا ..
بس سمبوسته ماشي مثلها ..

تعرف وين أقدر أحصله ...؟؟


بوخليفة ..
ماشاء الله عليك طلعت موسوعة مطاعم ..

:hii:

بوخليفة
10-06-2007, 03:54 PM
kH@LiD بو الامريكية شيبه ... يعني يوم بتقول له بالخير على طول بيعرف .....

ببو الامريكية إذا تبا سمبوسة نظيفة عليك بمخبز الواحة .... سمبوستهم ما تفرق على راعي السيكل اللي يحط السمبوسه في كرتون البيض .... وين موقع المخبز ما اعرف لكن في الجمعية فاتحين فرع السويحات ... اكيد تعرف وين السويحات مدرسة الشرطة... بس خلق الله اول ما يحط السموبسه خبر خير ما يخلون شيء .... لكن سمبوسه على كيف كيفك عاد يوم بتاخذ لازم تسوي سرات الهندي .. تبطل الصمونه وتحط في فيها السمبوسه وبصبعك العود تقطق السمبوسه في الصمونه وتحط على دقوس بوصقر وعليك بالعافية ...

Maroons of AD
10-06-2007, 03:56 PM
مطعم ابوكابي.... بجانب شيشة الحرافيش.

دمي أحمر
10-06-2007, 04:11 PM
ما شاء الله عليك بو خليفة ما خليت شي ..

شكلك وايد يوعان وطلعت كل اللي بخاطرك .. :blu:



وعقب ما تطلب بس تجدم 100 متر كافتريا تايلوس وخذ لك واحد كوكتيل فرش وسط بـخمس ريال....



وايدين من ربعي يمدحون عصايره ..

يباله اليوم عقب صلاة التراويح .. :head:

Go"A" Head
10-06-2007, 04:16 PM
في بوظبي عليك بمطعم مشاوي اسمه


بوكابي..

في الخالديه فيه اربع طاولات ولكنك ممكن تنتظر في فترة الذروة وهي من 8-10


لبناني قديم ولكن اكله فضيع مع فيو على حيوانات طائره تهبل مثل الصراصير

وسلطة الجرجير مميزه..

اتصل 181 وخذ رقمه واحجز (الحق ماتلحق)

دمي أحمر
10-06-2007, 04:19 PM
لبناني قديم ولكن اكله فضيع مع فيو على حيوانات طائره تهبل مثل الصراصير



احلى فيو :cra:

بوخليفة
10-06-2007, 04:22 PM
صح وفي مطعم يمني اسمه البحر الاحمر ... هذا من دوار سبينس وانت ساير صوب دوار الحكومة قبل مدرسة القاسمية سابقاً


مطعم عجيب جلسة عربية وتطلب لوبيا ويا خبز وقافي حار بس ما اعرف شو يحطون فيه ويكون حار واللوبيا ما تنحط في صحن

لا شرات المطاعم الصينية.... انت بس من تشم الريحه تتخبل

بوخليفة
10-06-2007, 04:24 PM
دمي احمر ... من الشارقة وما جربت عصير تايلوس عيل يبالك تجرب عصير جرجير

بن حريجة
10-06-2007, 04:42 PM
باك غازي ..:blu:

وعلى طاري السمبوسه..
في مطعم هندي في ام القيوين (طق إعصي عنده) ويسويلك بعد طلبيه مب مقلايه..
جاهزه للقلي (يعني سمبوسه طويلة الأمد)
بتحصله على ما أظن في الفريج الجديم (اللزّيمه أو يسمونه فريج اللبنه)

بـوعـوف
10-06-2007, 05:06 PM
دمي احمر ... من الشارقة وما جربت عصير تايلوس عيل يبالك تجرب عصير جرجير


:blu::blu::blu::blu:
دامك تشرب جرجير .. عيل يبالك تجرب سوبر فياجرا من عند أشرف فرغلي .. اسميه مضبوط :soc:
مكانه كالآتي :
ارجع من دوار نادي الفتيات وكانك داخل الشارجة من صوب مطعم المهلي للمندي .. ومن الدوار الياي لف يمين وبتحصله على يمينك مجابل مطعم الاوبرج ..
اسميه عصايره لذيذة .. ويبالك تجرب عصير المانجو المصري !!

بوشيخة ..
جربت الناشف مال الاصابع الذهبية اللي في الصناعية !!
أحلى ناشف بصراحة .. وحتى المشاوي اللي عنده لذيذة وبالذات الكباب

لوبيـــن ..

النيـادي
10-06-2007, 05:08 PM
مطعم راشد علي

العديد
10-06-2007, 05:10 PM
..ألحين يابو شيخه مالقيت الا كلمة "أقذر"..:om:

..وبعدين بسألك: انته في مانشستر ولا فالبلاد؟!...p4:

..ولا هو موضوع والسلام؟!..

..اظني لو خطفت جدامك ذبانه...بتكتب عنها موضووع انشائي..:cra:

..الظاهر ..طقطقت كورة تنس الطاوله..عامله عمايل..:bwroo:










**************************************************

كفاية خداع
10-06-2007, 05:24 PM
مطعم الفوار / على شارع النعيمية في عيمان ( أحلى مشاوي على مستوى عيمان )

مطعم وادي النيل / أم القيوين

كافتيريا شمس الأصيل :blu:

الشامسي 1911
10-06-2007, 05:27 PM
عندكم في الشارجه

مطعم قوس قزح!!!:head:

واحيد مطعم عدال حريه بس نسيت اسمه شو!!!!


وعدنا في العين

عبدو والعالم!!!:blu:

وكؤته بعد!!:bwroo:شغل عنقاش على كيف كيفك!!:blu:

عنقاش بس على اصول:blu:

La Stella
10-06-2007, 05:28 PM
في كافتيريا صوب معسكر فلاح عجيــــــــب..
شكله بيسحب البساط من رجب


بس للأسف نسيت شو اسمه

MIL.22
10-06-2007, 05:30 PM
مطعم راشد علي في العين

وايد اوكي ويمدحونه

كفاية خداع
10-06-2007, 05:39 PM
في كافتيريا صوب معسكر فلاح عجيــــــــب..
شكله بيسحب البساط من رجب


بس للأسف نسيت شو اسمه

جبل النور :soc:

RuiCosta
10-06-2007, 05:43 PM
جدام قصر زعبيل ... كان في مطعم او بالاحرى دكان .. ماله اسم .. بس كنا انسميه دكان المسيد

نفس بيت فيه دريشه .. نطلب من الدريشة لول ... لو اتشوفه ... بتنسد نفسك شهر كامل لول :blu:

احلى السندويجات كلتهن من عنده ... خاصة الهوت دوق

بس للاسف هدموه قبل سنة تقريبا :(





من عقبه ماكل الا في المطاعم الراقية :bwroo:

بوخليفة
10-06-2007, 05:46 PM
في دبي في كافتريا في شيشة الإمارات اللي عند كلدراي .... سندويشاته عجيبة وما تشبع .. عليكم بالربيان والناشف .... :cra:

سرحان
10-06-2007, 05:46 PM
ما شاء الله اكثر من 16 زائر للموضوع في وقت واحد قبل الفطور p4:
كلهم يواعى ما شاء الله
شو سويت بهم يا بو الامريكيه قبل الفطور :ops:


نرجع للموضوع
بخصوص مطاعم العين
عندك المطاعم الراقيه المعروفه في شارع خليفه
الفروج ، الفوار ، الديوان ، الخروف الذهبي ، صحارى .. الخ
و فيه مطعم هندي اسمه الوحيد .. بجانب الخيال للشقق الفندقيه .. بصراحه يسويلك طبخات بتاكل ايدك من وراها .. خاصه دياي 65 .. دياي بالزبده ويا البرياني و السلطات .. و خبز بالزبده بعد .. بصراحه شي ثاني .. شباب العين يبالهم يجربونه


و على مطاعمك المطلوبه
عندك صفصوف في شارع خليفه :blu:
و راشد علي أشهر مطعم فالعين
و مطعم فالصناعيه اسمه سراج .. يسويلك مشاوي و خبز و اشياء ثانيه حلوه
و عقب ما تخلص منه خاصه لو انك بتيلس في مبزره ولا بتسير البدع في رمضان هالايام .. اخطف على زعيم الكرك و خذلك دلتين وياك خله يعبيهن .. وحده كرك .. و الثانيه حليب بالزعفران و انته و الخير ارباعه :bwroo:
و عقب خذلك دور سبيت :blu:
و هاللي اذكره حالياً

و السلام عليكم

ELJDeeM
10-06-2007, 05:47 PM
مافي غيره ..... احتكار حمص باللحمه..فول ..
35 سنه من العطاء

مطعم ياتوت اكبريس ..... الصناعية الاولى
خلف الخوانيج للاطارات

بوخليفة
10-06-2007, 05:51 PM
حمص باللحمة .. ما في غير بو درويش ..... هذا دكتور لا وخقاق بعد ما يفتح في الإجازات .....


وإذا تبا فلافل صح لا ىمووون ولا شياته ....


عليك بكافتريا ريهام اللي ورا مديرية الشرطة .... حمزة وانا في الإبتدائية كنت اسير ويا الوالد ..... ما شاء الله دوم زحمه عنده واظني اهل الشارجة كلهم يعرفونه

الطير المهاجر
10-06-2007, 06:03 PM
انا كل ما ابي اكتب عن مكان القاه فالردود اثاريكم خبره لكن التكرار يعلم الشطار:blu:

اول شي بوخليفه ذكر النبع والناشف الرهيب وبما اننا على الناشف فهناك حمزه او تجاريا معروف بريهام:bwroo: وننتقل للجهه الاخرى من البلاد وهي الصناعيه عندك مطعمين لا ثالث لهما الاول صديق الشرده بعد ما تعفد من فوق يدار المدرسه دق الموتر سلف واتجه الى ياتوت اكسبريس واسميك يالجديم فتحت الجروح:bwroo:

وبعده بعدة كيلومترات تجد الرهييييييب الاصابع الذهبيه او مثل ما نسميه فالدوام الفناقر الذهبيه:blu: اطلب ناشف او كفته لكن والله انصحك بالكفته وبتدعون لي ويمكن تعزموني وانا ما اقول لا :cra:

لمحبي السمبوسه وانا منهم
اولا- عندكم بمحطة بترول الامارات اللي بالقاسميه مجابيل 050 سمبوسه ولا بالخيال وحتى الكيمه

ثانيا ايضا بمحطة بترول الامارات اللي بصناعية عيمان بعد سبلاش يقليها عند الطلب

وعندكم كافتيريا العياده بأم خنور :blu:

وهناك ايضا بأم القيوين وادي النيل معروف وما يحتاي ولكن هناك ايضا فانيسيا الصراحه ناشف يذوب فالحلج عجييييييييييييييييييييب جربوه

لكن مطعم بالشارجه حق مزر الكرش فبحر الامارات هو نجم شباك الموسم
وجربوا سلطة الجرجير وخبروني:bwroo:

بالنسبه للعصاير والتوتي فروتي عندكم اميجوس وهذا اللي بالخزاميه فورتي فروتي
وهناك تايلوس الخطير

ملاحظه :انا مب متين لكن اعشق الاكل:blu:

بوسلطان80
10-06-2007, 06:03 PM
الصراحة شباب الي من الشارجة ويبا يجرب احلا مشاوي في حياته ماله غير مطعم في دوار الساعة اسمه هاي بروست..بس اطلبو عنه مشاوي مشكل .....ييبلك اياه ويبا براته حاااارة......

واحسن بروستد ماشي غير مطعم سندس الي موجود على نفس شارع استوديو الزورق(على ما اعتقد)...

L.MESSI
10-06-2007, 06:30 PM
ول

اكيله من خاطر ..!


























ماشاء الله

يعطيكم العافيه

kH@LiD
10-06-2007, 06:38 PM
اتصدق ريبري ..كلهم اكيله وكلهم ضعاف سلق ....:blu:

ريـان
10-06-2007, 06:44 PM
ماشاء الله مواضيعك اخوي ابو الامريكية من هالنوعية دائما ....

نعرف ليش ....؟

انا ماعندي غير المشاهدة خخخخخ.... عاد إذا تبون مطاعم بالمنطقة الشرقية مستعد

فأنا موسوعة كاملة لكافة المطاعم .... بحكم اكلي اليومين (غداء وعشاء ) من المطاعم

بالتوفيق ... وأكل هنيء ان شاء الله ... بس ماسئلت عن الجانب الصحي لهالمطاعم...؟؟!

إعمار
10-06-2007, 06:58 PM
مطعم ابو كابي في الخالدية على قد المقام بس اكله حلو و ما عنده فرع
على فكرة ابو كابي توفى من كم شهر
في الشارجة عندك في سوق العرصه مطعم شعبي اكله حلو
في دبي مطعم كباب خاص
في عيمان لم ينجح احد
في راس الخيمة مطعم ابو نعيم (فلافل)

Moh@mmeD
10-06-2007, 07:17 PM
كفتريا بو الخير

حق اخر الشهر يمدحونها

2 فلافل وواحد بيبسي الحساب يطلع 4 درااهم لووووول

Maroons of AD
10-06-2007, 07:30 PM
مطعم ابو كابي في الخالدية على قد المقام بس اكله حلو و ما عنده فرع
على فكرة ابو كابي توفى من كم شهر


هيه والله توفى
الله يرحمه

قبل شهرين دخلت المطعم شفتهم معلقين صورته عليها خيط اسود... انصدمت والله
بس ابنه الحين امشي الشغل

الدوري انذبح شرعي
10-06-2007, 07:38 PM
في بوظبي مطعم الابراهيمي يمدحونه فالمشاوي

بس اللي يحبني ... يعزمني على مطعم الربان اللي فالمرور.... اموت على المظبي والمندي اللي عندهم :bwroo::bwroo: عاشو قوم بو يمن

أبو الأمريكية
10-06-2007, 07:39 PM
عزيزي العديد ..



كلمة (( أقذر )) جاء تفسيرها في أصل الموضوع ..!!
أنا في مانشيستر .. لكن قريبا بإذن الله في البلاد ..!!
وصدقني إنه الموضوع ليس للسلام وفقط ..!!
أنا بالفعل في بعض الأحيان أرتاد مثل هذه المطاعم ..!!
والشباب ماقصروا في الأقتراحات ..!!

وأباك تجرب شئ منهن وتخبرني ..!!

:blu:










عن نفسي ..
من أرد البلاد .. عندي مطاعم أو سموها اللي بتسمونها لازم أمر عليها ..

- كبابي المصلى .
- فلافل بالخير .
- مشاوي الأصابع الذهبية .
- زعتر مع الخضار من مخبز الريف اللبناني الشرجاوي (( ترتيب بصراحة ))
ناوي على سورية :hii:
- خبز مشاوه من عند كراشية البحر .







ماشاء الله .. تبارك الله ..
يوعتونا ..
يبالنا أنا kH@LiD نمر على كل هاي المطاعم ..
ومن كل بستان زهره ..

:head:





للجميع كل الشكر ..

مدمن الأخوه
10-06-2007, 07:40 PM
.
.

بو الامريكيه

جرب مطعم وادي النيل في أم القيوين .. رغم انه صغير بس الشباب عليه ماشاء الله !!

.
.

سامع عن اكله اسمها " ربشه " .. بصراحه رهيبه جربها في مطعم عروس دمشق في المرقبات
لاتفوتك .. تنفخ بطنك وتسد نفسك عن الاكل يوم كامل .. لانها ثجيله

.
.

اللي يبغي شاورما مكسيكي عليه بالفروج الطازح في المطينه في دبي .. بصراحه احلى
مكسيكي كلته

.
.

واللي يبغي تكه على كيف كيفه .. في مطعم زهره لبنان في المطينه في دبي بعد الفروج تقريبا
بصراحه مطعم صغير بس رهيب ..

.
.

مطعم ايراني .. هو ارسلان في المطينه واذا تبغي النادي الايراني خلف نادي النصر

.
.

اذا تبغي مطعم هندي .. هو أشهر مطعم هندي في مومباي اسمه " دلهي دلبار " وله 3 فروع في دبي
اذا تبغي تاكل وتشم ريحة هنود عليك بفرع نايف .. واذا تبغي شوي ويا العايله عليك بالفرع اللي مجابل
البريد المركزي في الكرامه

.
.

واذا تبغي مجبوس تضرب به بيدك وروب وحركات .. عليك بمطعم نادي النصر
اللي حذال السينما :blu: .. المكان يلوع بالجبد بس شبابي وبسيط :blu:

مدمن

حركات666
10-06-2007, 07:41 PM
عندك مطعم كراتشي دربار في كل مكان بتحصله

Rossoneri
10-06-2007, 08:02 PM
مـــالك إلا راشــد عــلي فالــعين ..

وكــباب بحــريني في دبــــــي ..

:hii:

للتوضيح
10-06-2007, 08:06 PM
بحر الإمارات لا يفووووتك .. خصوصا الدبل سبايسي في العيوش و البرياني ..
تصدق دقيت عليه مرة .. بغيته يوصل لي طلبية .. قالي كل العيش مخلص << كانت الساعة 1 الظهر ..
قالي ما اقدر .. قعدت احايل به ... قال في طلبية جامعة الشارجة .. قلت له جيب لي و انا بزيدك .. قالي مافي <<< ذل شرفي على صحنين برياني ..

آخر شي طلع مجموع طلبياته لسكن الطالبات جامعة الشارجة ( 365 صحن عيش !!!!!!!!!!!! ) ...
الطير المهاجر ..
جرب ( دياي كولاباري ) الي عندهم ... بيعيك

يعيبني الآجار ماله .. و الروب .. اطلب اكسترا .. و خبز نان .. 5 حبات .. و غرشتين بيبسي ..

* * *

مجابل معسكر الفلاح .. عندك كافتريا بون برجر .. هذي اكلها ترتوب .. نظيف .. وماشي حاله .. تعيبني عصايرهم .. و انا طالع من المدينة الجامعية .. امرهم .. اطلب لي عصير مانجو + طشونة افوكادوا و فراولة .. وخل يحط لك عسل فيه ...
و آخذ لي فطيرة بيتزا من فطاير الخليج الي يمه !!! ( مثل فطيرة الجبن وغيرهن ) ..


* * *

للشوارما المكسيكي ..

لا تفوتك مال الطازج .. و احلى فرع يسويها بين فروعه كلها .. الي مجابل سوق الذهب بالذهب .. والله ماتتفوت ...

و احلى سمبوسة .. من مستر بيكر .. اللي بالصناعية ... شغل عدل .. تعيبني الكبيرة .. اكثر من الصغار ...


* * *

بشكل عام .. انا الحلاب - ديرة .. رايح راد عليه اكله ولا احلى....


* * *

تذكرت أحلى كافتريا .. صوب بو الهيل .. ورى شومارت بتحصل كذا محل حلويات تونسية و مغربية ..
بنهاية هالسايد .. بتحصل كافتريا اسمها كافتريا الجبل الأزرق ..
اطلب من عنده .. ساندوج جيكن جلي بـ خبز براتا .. والله لاتاكل إيدك ورااااه .. طعم خيالي .. ومكان نظيف .. من سنة مب ساير صوبه ..
شكله ناوي عليه بعد حين ...

** *


لكن فعلا ... مطعم بحر الإمارات .. هالمطعم عليه إقبال كبير .. وبشكل فضيع ... باليوم يدخل فوق الـ 3000 !!

نجم الموسم مثل ماقال الطير !!

نصراوي_vip
10-06-2007, 08:56 PM
كباب محمد علي في الشارجه ((كباب مادلي))

CLC
10-06-2007, 10:18 PM
أحلى شي تأكل من مطعم يجهز الدياي جذيhttp://www.uaegoal.com/vb/images/smilies/bluebiggrin.gif http://www.s77.com/up/up9/1e424a050b.jpg

بو شيخة راعي السمبوسة مستنسخ نفسة متواجد بشكل دايم عندنا وآخر مرة شفته قبل رمضان يحوط في الخزامية والكرتون السحري على راسة ,,

وكان فيه واحد غيره يبيع السمبوسة في مدرجات نادي الشعب قبل موسمين http://www.uaegoal.com/vb/images/smilies/bluebiggrin.gif بس اختفى :) واعتقد انه فتح له مقر ثابت في الشعب موول http://www.uaegoal.com/vb/images/smilies/bluebiggrin.gif

نقلت موضوع من فتره عن المطاعم في السعودية والقذارة الي فيها من موقع الساحه مدعوم بالصور تفضل http://www.uaegoal.com/vb/showthread.php?t=96396

ر تحياتي

uaeloool
10-06-2007, 10:25 PM
يوم بتلعبون ويا نادي الامارات براااك تعال عند:


1- مطعم فروج الوادي طبعا الشوارما مكسيكي يختلف عن كل الشورماتوالدولة فيه نكهة خاصة بس غالي كان بثلاث نص استوى باربع!!

2- مطعم خالد و مطعم مراد زاهي الاول قريب من السوق الكويتي و مبنى الحكومة الالكترونية المتهالك خخخ و الثاني اخر الكرنيش...جميع انواع المندي و العيوش و المشاوي الهندية و خبز نان بس شي طيب لكنه بسيط و عليه اقبال خصوصا مطعم خالد لاقدميته!!

3- مشاوي الخروف اشهر مشاوي براس الخيمة تقريبا موجود من 35 سنة ماشاءالله و الاقبال عليه حدث و لا حرج و الوالد يقول انه فيه خلطة سحرية الطعم ما تغير من افتتاح المطعم!!! احلى شي صحن الكباب و العرايس..(اللي يشتغلون فيه هنود مب شاميين بس هم تفوقوا على الشاميين كيف مادري!!)

و فيه الكثير!!

لكن هؤلاء الاشهر..

حياك بوشيخة..

الطير المهاجر
10-06-2007, 10:26 PM
اخوي للتوضيح ذكرتني بالحلاب والسجق ماله رهيييب

ماشاء الله ربعنا اكيله

نسيت مطعم شهير بالشارجه لمحبي الفول والمشكل وغيره

مطعم آمون فنان
لكن بخبركم سالفه
عندكم وقت اكيد بطاليه:blu:

مره ساير انا ويا شلة الانس (ربعي):blu:

المهم لقينا امون مصكر

ظاق خلقنا
قبل لانركب الموتر لمحنا مطعم الحوت
قلنا وابوك هذا هو:soc:

المهم دخلنا وطلبنا الاكل ما كان ذاك الزود وانا اشم ريحه مب غريبه ريحة سلوم(شيشه)
:uns:

المهم لمحت وحده عند المحاسب

وفجأه وبدون سابق انذار دخل المعلم الكبير:helpp:

فما كان من ولده الا وصرخ بأعلى صوته

(( يا محمد جيب الشيشه لبابا ))

اربيعي سألنا هذا اللي داخل معلم شيشه ولا طباخ اثاريه 2 في واحد1:blu:

وما تلقانا الا لابسين الباب ويقولنا ولد المعلم انشوفكم المره الجايه واربيعي يقوله بالاتراح انشالله:blu:

الطير المهاجر
10-06-2007, 10:30 PM
Clc
ذكرتني بايام نادي الشعب والسمبوسه

اذكر يوم صغير اسير النادي ويا ابوي عسب السمبوسه بس ولا انا تعرفوني شرجاوي والوحيد فالعايله والبقيه شعباويه مسكين انا:blu:

CLC
10-06-2007, 10:40 PM
Clc
ذكرتني بايام نادي الشعب والسمبوسه

اذكر يوم صغير اسير النادي ويا ابوي عسب السمبوسه بس ولا انا تعرفوني شرجاوي والوحيد فالعايله والبقيه شعباويه مسكين انا:blu:

اها الحين تاكل سمبوسة وانت صغير في مدرجات نادي الشعب وكبرت وترعرعت وتغذيت من الاكلة الشهيرة فيها وآخرتها تشجع الشارجه :ban: هذي اعتبرها خيانة سمبوسية :blu:

الله يوفق

تحياتي

عيناوي العاصمه
10-06-2007, 11:23 PM
فبوظبي لو تدور مطعم على قد حالك ..

مطعم اليمن السعيد في المرور مقابل نادي الجزيره بالضبط اكله فنان و رخيص تبى الصراحه .. عيوش و مندي و فول و بيض طماط و خبز رطب (اليمني) و غيره .. بتحصل نص لعيبة الجزيره طايحين هناك هههه

للتوضيح
10-06-2007, 11:25 PM
clc

إلا ماخيانة سمبوسية :cra: حبيتها الصراااحة ...


الطير المهاجر ..

جانك من ربع امون .. جرب الكشري ماله .. ماعليه زود .. جنك تاكله من كشك مصري في حواري الاسكندرية :hii:

Darwish Alwasl
10-06-2007, 11:30 PM
عليك بقيصر اللي في الشارجة .. عجيييييييييييييييييب :)

زعيم الإمارات
10-06-2007, 11:48 PM
ترى قالكم بو شيخه ... يريد الاقذر :blu: ما يريد مشاوي

بعدين تعالوا ... هل العين نسيتو مطعم عبد العزيز !!!!!!!!
مطعم راشد علي و عبدو ...
هايل الثلاثي المرح في العين ...

---- دبي عندك تركي في هور العنز
الاجازه و محارة البحر في الجميرا ..
واحلى سمبوسه موجوده في مطعم بوكدره طريق العين - دبي


--- الشارجه : مطعم قرطبه ... ما اول :cra:


---- عيمان :
شي شيشه ادنوك ... شارع المطافي ... داخلها كفتيريا ... تسمم
و شي كفتريا في السينما الهندية في عيمان شارع الشيخ حميد ... تسمم

أبو الأمريكية
10-08-2007, 03:31 AM
شهيتونا ..
هاي المطاعم يبالي سنة أمرمر عليها ..

:soc:



كل الشكر للجميع ..

قناص العين 999
10-08-2007, 04:00 AM
ربعنا طلعوا من قوم يأجوج و ماجوج ما شاء الله لووووووووول

أمونه المزيونه
10-08-2007, 04:44 AM
اوووه .. واايد بتلاقي صوب مدري وين عند الدوار

Saqer
10-08-2007, 09:26 AM
مطعم دبلومات بس نسيت اسم المنطقة

اظن صوب الرولة الطلبية ( حمص باللحمة )

وعليك بالعافية

Adsense Management by Losha